巨騰(3336)在星期五發通告，將於3月17日公佈全年業績，這個令青冰較為失望，而且仲認為佢哋變相出了一個小盈警添。
點解咁講呢，先睇幾個數字，巨騰2019年全年盈利是1.45億，而去年公佈的上半年盈利係2.27億，換言之下半年即使唔賺錢，都會按年增長56%，通常啲公司按年多賺五成，都一定盈喜了，巨騰亦都不例外，戰友可以睇吓圖二，由2010年至2020年，發盈喜及盈警的通告都有14個，算係發得幾密，而青冰睇過晒啲通告，基本上係盈轉虧啦，虧轉盈啦，盈利上升及下跌呢，就起碼四成以上的變動，即係話，呢間公司認為這些幅度就值得向股東提出通報，而且都會在公佈幾時出業績之前講。
不過今年就無盈喜，直接公佈幾時公佈業績，經過往績分析，即係話盈利變動唔大，對於普通公司，去年盈利無乜大跌，已經係超好事啦，疫情嘛，但可惜的是，巨騰去年上半年已經賺2.27億，即係話下半年有機會係蝕少少錢，令到全年盈利變返只增長兩三成，咁就不需要發盈喜。
咁點解laptop機殼大賣，都要蝕呢，極有可能是人仔的匯率問題，過去的十年，公司經常發盈喜盈警，其中一個原因係人仔匯率的顯著變動，佢哋收入係美元，生產成本係人仔，去年上半年人仔下挫，毛利率跟住上升；但下半年美元極弱，人仔升咗8%，所以可能就係呢度出事，雖然管理層在半年業績時講過會採取措施減低影響，但最後有冇做到，成效如何，3月17日先知。
這可能解釋了這半年唔郁的原因，但情況又未致太悲，只是變成不是超抵買了，無盈喜就無了動力，而且人仔匯率嘅嘢，隨時變方向，上星期五美國出咗個非農靚數，美元反彈，CNH都行咗二百幾點子，如果未來一段時間人仔弱返，又會變成助力，所以往後睇呢隻股，除了睇產品銷售條數，仲要睇實人仔呀。
Search